Blank is før jul

Dag og Gjert er til fjells trass vinterkulde. Det er kaldt, -13 ute og -7 inne (!), men det er her oppe sola skin. Vatnet er blankfrose, med 21 cm stålis av blankaste og beste kvalitet.

Vi er i seinaste laget for å tappa ut vassverket. Vi må hogga slangen ut or bekken, det er is i ølet, men etterkvart sprakar det i omnen og det er gode greier.

Vi har med ny stige til hemsen, og den kan jo vera grei å ha dersom ein går gjennom isen. Men isen kan vel bera ein elefant, visstnok skal 14 cm vera greit for folk.

Vintermorgon

Isboren maktar ikkje denne iskvaliteten, så øksa er best uansett.

Ein einsleg skeiseløpar glir over isen, det er Bjørn Egil Haugland som er oppe for å prøva isen.

Vi er og på glattisen, og ein kjem i hug Bambi. Det er forresten ikkje noko å seia på isprepareringa.

Vi snur båten for vinteren og går mot ein stilig solnedgang.